A dawltu

BCM BAZAR VENG, BAZAR PASTOR BIAL LUNGLEI

A dawltu lamte biakpawh theihna

Kum 1946 hma lam kha chuan Lunglei-ah hian veng thum chauh a awm a. Rahsiveng, Bazar Veng leh Bawngveng (tuna Venghlun ni ta) te hi. Kum 1911, February ni 2-ah Rahsiveng Kohhran din a ni a, member 20 chauh an ni. Biak In pawh Rahsivengah chauh a awm. December 14, 1946-ah Bawngveng-ah Kohhran a ding leh a, member 8 chauh an ni a, Pu Kawnga inah an inkhawm a.

Mihring an lo pung zel a, tichuan Bazar Vengah Vanhne atanga lo pem Upa Lianchhunga hovin Kohhran indan zai an lo rel ta a. May 1, 1947-ah inkhawm hmasa ber Pu Chhingkawnga inah an nei ta a. Hetah hian kum chanve aia rei deuh an inkhawm a. Kohhran member an lo pung ve zel a, Pu Chhingkawnga inah an len loh deuh tak avangin Upa Lianchhunga choka-ah an insuan a, hetah hian Biak In neih hma zawng, kum khat aia rei deuh an inkhawm a, member 98 an ni.

Vawi khat chu Kohhranten BMS Missionary Pu F.J. Raper-a thusawi an sawm a, inkhawm banah chuan Pu Reia-ho chuan Kohhran hruaituten Biak In sak an rel a, tha an ti tlang a. Tichuan tuna Biak In ding lai hmar lam Pu L. Siama (F/o Pu J. Lalbiaktluanga @ Pu Taw-a) in hmunah Biak In chu March 25, 1949-ah an rel tan ta a. Rei an sa lo, April 10, 1949-ah Biak In hmasa ber, a chung di, a bang mau, a ban thingril leh a chhuat lei chu hawn a ni a, a hawngtu Rev. Challiana a ni. Pu Reia nupu-in Kohhrante Dar a pe a, Rahsiveng Kohhran pawhin indan nan Rs 26/- an pe bawk.

Presbytery-in Lunglei khaw chhung Kohhran enkawl turin Pastor Khuanga a pe a, April 28, 1949-ah an chhungin Bazar Vengah an lut a. Hetih lai hian Kohhran member 128 an ni tawh. Pastor hovin Kohhran Committee mumal din a ni ta a, heti ang hian hotu an inruat:

Chairman : Upa Lianchhunga

Secretary : Upa Vannghaka

Treasurer : Pu L. Kira

Committee member te chu – Pu Lalnghina, Pu L.H. Vannawma, Pu L. Siama, Pu Chhingkawnga, Dr. Doliana, Pu Thangchina leh Chalthueva te an ni. May 16, 1949-ah Nilaini zan inkhawm an tan hemi thla atang vek hian Girl Auxiliary (GA) (tuna BKHP) an din a, Buhfaitham an enkawl nghal a.

Kohhran member an lo pung ve zel a, Biak In thar, lian sak a ngai ta. Tuna Biak In dinnaah hian Ft 20×40 a lianin rel a ni a. Hetih lai hian Zotlang Presbytery-ah Pu Buanga hmingin pawisa khawn a ni a, Rs 1,236, Ana 6, Pai 6 hmuh a ni. Presbytery hian pawisa Bazar Veng Biak In sak nan a pe a, Biak In, a chhuat cement, a bang tile leh a chung rangva chu sak zawh a ni a, September 26, 1954-ah Rev. Zathanga’n a hawng a, member pawh 560 lai an ni.

Biak In sak vawi 3-na chu February 8, 1977-ah Pi Zomawii'n a lung a phum a, March 2, 1985-ah Rev. Dr. C.L. Hminga’n a hawng a, sum sen zat Rs 338,617/- a ni a, tha 2120 sen a ni bawk.

Pathian khawngaihna Kohhran lo thang zelin tuna Biak In thar leh lungphum hi March 7, 2012-ah Rev. H. Liangaia’n a phum a. A hmasa atan Hall sak a ni phawt a. Tuna kan Biak In luah lai Building hi kum 2020 atangin thar thawh a ni leh a. Biak In sak kan thar thawh leh February 3, 2020 atang hian December 4, 2025 thlengin Rs 131,952,214/- sen ral a ni tawh. Kum 2026 BCM Assembly thleng tura min ruat avangin hemia luah hman turin theihtawpin tan kan la a ni.

BCM Bazar Veng atang hian Kohhran pahnih an lo indang tawh a, chungte chu :

BCM Edenthar - Ni 1 May, 1985

BCM Kikawn - Ni 5 May, 2007

BCM Bazar Vengah hian BCM Assembly hi vawi 6 (1960, 1970, 1982, 1991,1999, 2008) ah te nghah alo ni tawh a, tun tum hi vawi 7 kan dawlna tur a ni.

KOHHRAN HRUAITUTE :

1. Rev. K. Lalbiakchhawna (Bialtu Pastor)

2. P.P. K. Vanlalpeka (Pro Pastor)

3. Upa S. Vanlalnunga

4. Upa C. Hmingliana (Chairman)

5. Upa Biakchungnunga (Secretary)

6. Upa C. Zairemthanga (Asst. Secretary)

7. Treasurer: Upa B. Dangliana